Mafanikio Ya Ki-MUNGU

Praise The LORD!
Mungu yu mwema kila wakati....

Leo tuongee kidogo kuhusu mafanikio.Kuna mafanikio yanayotoka kwa Mungu na yale yatokayo kwa yule mwovu,ibilisi.Mafanikio yanayotoka kwa Mungu huwa yanadumu,maana yana ulinzi wa Mungu ndani yake,hayana masharti.Nira ya Mungu ni laini Mathayo 11:29-30 tunaona Bwana Yesu anawaasa ya kuwa wajifunze kutoka kwake,maana yeye ni mpole na mnyenyekevu wa moyo na kwamba watapata raha nafsini mwao,maana nira yake ni laini,na mzigo wake ni mwepesi. Mungu ni BaBa mwenye upendo.Akikubariki anafanya hivyo kwa moyo wake wote.Anakubariki baraka za rohoni mpaka za mwilini pia,anakupa amani wakati wote.

Lakini haya yote hayaji hivi hivi tu,kuna gharama za kulipa lakini gharama hizi ni nyepesi sana.Sio kama za shetani,ambazo ni ngumu sana,nzito,zinazogharimu maisha ya wapendwa wako kila mara,halafu mafanikio yenyewe hayadumu,tena yana masharti yasiyofaa, ya kudhalilisha.

Katika kitabu cha Yoshua 1:7-9 BWANA alikuwa anaongea na Yoshua baada ya Musa kufa akamwambia,

7 Uwe hodari tu na ushujaa mwingi, uangalie kutenda sawasawa na sheria yote aliyokuamuru Musa mtumishi wangu; usiiache, kwenda mkono wa kuume, au wa kushoto, upate kufanikiwa sana kila uendako.

8 Kitabu hiki cha torati kisiondoke kinywani mwako, bali yatafakari maneno yake mchana na usiku, upate kuangalia kutenda sawasawa na maneno yote yaliyoandikwa humo; maana ndipo utakapoifanikisha njia yako, kisha ndipo utakapositawi sana. 

9 Je! Si mimi niliyekuamuru? Uwe hodari na moyo wa ushujaa; usiogope wala usifadhaike; kwa kuwa Bwana, Mungu wako, yu pamoja nawe kila uendako.

Mambo makuu matatu(3) Tunayotakiwa Kufanya

1) Tunakiwa kuwa hodari na wenye ushujaa mwingi.

Ina maana kuelekea kwenye mafanikio utakutana na vikwazo vingine vinakaribia kukatisha tamaa kabisa maana kumbuka kwanza shetani hapendi uwe levo nyinigine ya juu.

Mungu alimsisitiza Yoshua ya kwamba awe hodari na mwenye ushujaa mwingi.Kwa kifupi Mungu hapendi mtu uwe na tabia ya woga maana kwanza woga hautokani naye.2 Timotheo 1:7 inasema 

'Maana Mungu hakutupa roho ya woga, bali ya nguvu na ya upendo na ya moyo wa kiasi'.  

2)Uangalie na kutenda sawasawa na maandiko yanavyosema,usigeuke kulia wala kushoto.Kwa maana nyingine usipindishe chochote.Hapa sasa ndio tuulizane.Tunasoma maandiko kila siku?Tunayaelewa vizuri?Tunayatafakari mchana na usiku kuyazamisha kwa kina kwenye mioyo yetu?

Hivi unafahamu maandiko ndiyo mwongozo wote?Kuna majibu ya mambo yote chini ya jua kupitia maandiko ambalo ni Neno la Mungu lililo hai.Ndio maana mtunga Zaburi aliona hili na akasema wazi katika Zaburi 119:105  ya kwamba 

105 Neno lako ni taa ya miguu yangu, Na mwanga wa njia yangu.

Usiposoma maandiko unajuaje haki zako?Unajuaje namna ya kumshinda shetani?Unajuaje mambo unayotakiwa kufanya na usiyotakiwa kufanya?Mungu anazungumzaje nawe?japo zipo njia nyingi ambazo huwa anatumia lakini hii huitumia sana maana ni lazima athibitishe kila asemalo kupitia Neno lake au maandiko.Kwa kifupi kama hatusomi Biblia,tuanze.Kuna majibu ya maswali yote chini ya jua.Roho Mtakatifu ni mwalimu mzuri sana.Atakufundisha,utaelewa.Maana Biblia si kitabu mtu akisoma anakielewa kirahisi.Lakini ukishampokea Bwana Yesu na Roho Wa Mungu akawa ndani yako,anakufundisha unaelewa vizuri sana.

3)Uwepo wa Mungu kwenye maisha yako.Tunaona kwenye mstari wa 9 hapo juu Mungu alimhakikishia Yoshua kwamba yupo pamoja nae kila aendako.Na Mungu akiwa upande wako ni nani anaweza kuwa kinyume chako?

Sasa swali kwetu,umeshamkiri Bwana Yesu kuwa Bwana na Mwokozi wa maisha yako?Maana ukishamkubali tu,anatembea pamoja nawe kila uendako na ndio mwanzo wa kufanikiwa maana YeYe,Mungu Baba na Roho Mtakatifu watafanya makazi ndani yako na watakuongoza na kila unapotii na kufanya vile Roho Mtakatifu anavyokuamuru,utafanikiwa.

Barikiwa sana.

Mpaka wakati ujao,

TANZANIA KWA YESU!

Je,Unafahamu Vipaji Ndani Ya Wanao?

Praise The Lord!

Watoto ni baraka njema mno kutoka kwa Mungu.Nikiwa kama mzazi niliyebarikiwa watoto wazuri watatu,mmoja wa miaka mitano na mapacha wa miaka miwili,nimeanza kuwa-expose kwenye mazingira tofauti ili nione nini kila mmoja anapenda.

Ninapoanza kumsifu Mungu kwa kupiga kinanda huku naimba,wote wanakuja haraka sana na wanaimba na mimi huku wakionyesha kila dalili kwamba wanatamani kupiga chombo hicho nami.Nikiwa na-design nguo na kushona,yule mkubwa huwa anaonyesha 'interest' sana.Kwa hiyo najua nikimuweka vizuri naweza nikapata designer mzuri sana wa nguo hapo,licha ya kuwa mpigaji mzuri wa kinanda.

Bado ninaendelea kufanya utafiti wa kuwaweka mazingira tofauti tofauti ili nione nini kingine ambacho kila mmoja atakuwa anapenda,kama si wote.Ili kufanikisha hili inahitaji mtu uwe 'multi-purpose'.Uwe na vipaji vingi na uwe unavitumia wakiwepo.Si jambo rahisi sana,ila 2Wakorintho 9:6 inasema Apandaye haba atavuna haba.... Na lingine Wagalatia 6:7-8 'Msidanganyike mungu hadhihakiwi; kwa kuwa cho chote apandacho mtu ndicho atakachovuna maana yeye apandaye .......

Huyu mtoto pichani juu na kwenye video chini, anaitwa Jotta.Ametokea Brazil.Amenikosha moyo sana.Nina uhakika hata Mungu akimwona anamfurahia maana ni chombo chake kizuri sana cha kusifu na kuabudu.Ameimba wimbo ule wa Agnus Dei,Halelujah,wa Michael Smith.

omg! anaimba vizuri mnooo....hebu msikilize....

Hiki ndio ninachozungumzia. Tunapanda nini kwa watoto wetu? Tunataka mtu/watu wa aina gani kwenye familia,jamii na taifa baada ya miaka kadhaa? Mungu atusaidie tuwakuze vyema. Mpaka wakati ujao... TANZANIA KWA YESU!

UAMINIFU WA MUNGU NI MKUU

Kumbukumbu 7:9

9 Basi jueni ya kuwa Bwana, Mungu wenu, ndiye Mungu; Mungu mwaminifu, ashikaye agano lake na rehema zake kwao wampendao, na kushika amri zake, hata vizazi elfu;

Praise The LORD!

Mungu wetu ni mwaminifu mnoo!Haijalishi umemwomba nini ali mradi iwe sawasawa na mapenzi yake na uwe unamcha na kumpenda,atafanya.Unapomwomba,muamini.Muachie.

Isaya 41:21 amesema "Haya,leteni maneno yenu,asema BWANA;toeni hoja zenu zenye nguvu,asema mfalme wa Yakobo'.

Ukiona ka-muda kanakwenda,mkumbushe.Maana amesema hata kwenye neno lake katika Isaya 43:26 'Unikumbushe,na tuhojiane;eleza mambo yako,upate kupewa haki yako.'

Nina ushuhuda wa haraka ambao umenitokea leo hii hii juu ya jambo hili.Wiki mbili zilizopita kuna jambo fulani ambalo nilikuwa ninalihitaji mno mno kulifanya na ufumbuzi wake usipite hizi wiki mbili.Nilipokuwa naomba usiku nikamshirikisha Mungu.Wakati naendelea kuomba nikasikia sauti ya utulivu sana ikiniambia mshirikishe 'fulani' hilo jambo.Pale pale nikajua Mungu anataka kumtumia huyo mtu kunisaidia kulipatia ufumbuzi.Nikamwomba palepale Mungu kibali kwamba nitakapoenda kumshirikisha huyo mtu,alipokee,na anipatie ufumbuzi.Hiyo ilikuwa ni wiki mbili zilizopita.

Kesho yake nikampigia simu yule mtu,tukaongea vizuri akaniambia jioni ya siku inayofuata tuonane.Siku iliyofuatia kweli nikaenda.Nikamshirikisha kila kitu lakini cha kushangaza nilisahau kumwambia deadline.Akaniambia nimuachie alifanyie kazi.Tukaachana.Kwa kifupi alikuwa ameelewa.Wiki ikapita,huku naona wiki moja tu imebaki linatakiwa ufumbuzi.Nikampigia simu yule mtu kumkumbusha,akanipa jibu la nusu nusu au fifty fifty.Ni kama atanisaidia lakini inavyoonekana itakuwa nje ya muda ambao jambo hili linahitaji.Kwa maana nyingine hata akinisaidia muda huo kama ni zaidi ya wiki moja ambayo ndiyo imebaki,huo msaada hautakuwa na maana tena kwangu maana muda utakuwa umepita.Nikawa mpole.

Mwisho wa hiyo siku ulikuwa ni kesho.Toka jana jioni nilikuwa katika hali ya upole sana.Shetani naye hakucheza mbali  nilikuwa nasikia enhe?! za hapa na pale.'Enhe?!kiko wapi?Yuko wapi Mungu?au ndo ushaharibu mahali.Mbona hajibu.Utakuwa umeharibu mbona hajibu?Nilimwambia shetani hata uongee vipi hainibadilishi kutokuwa mtoto wa Mungu na nikamwambia Mungu hata kama halitafanyika utabaki kuwa Mungu,hautabadilika,wala mtazamo wangu kwako hautabadilika.Hayo ndiyo maneno niliyokuwa nayasema kila nikikumbuka kwamba muda unakwisha halafu kimyaa!

Leo asubuhi nikaamka nikamshukuru Mungu kwa kifupi tu,nikasema maneno yale yale tena utabaki kuwa Mungu kwangu na nitakuabudu siku zote mimi na familia yangu.Ikafika kama saa tano asubuhi,nikakaa chini mahali nikamwambia Mungu nakutegemea,naomba unisaidie.Nikaondoka kwenda na mambo yangu mengine.Nilipofika napokwenda nilipotulia chini nikaona missed call ya yule mtu ilipigwa kumbe saa sita kasoro nadhani nikiwa naendesha  gari, simu ipo kwenye pochi sikusikia.Nikampigia yule mtu,akaniambia nimekutafuta kwenye simu sana,nimeshalipatia ufumbuzi jambo lako uje leo hii hii!Yani alikuwa anaongea kwa msisitizo kama vile nisikose.Haleluya!Mimi nimeshangaa kwa sababu yule mtu hakuwa anajua 'deadline' ya hilo jambo kuwa ni kesho.

Huyu ndiye MUNGU tunayemwabudu aisee.Nina shuhuda nyingi mno mno kwenye maisha yangu katika nyakati tofauti ambazo Mungu amekuwa akinitendea mambo makuu.Tutakuwa tunashirikishana.

Zaburi 91:4

4 Kwa manyoya yake atakufunika, Chini ya mbawa zake utapata kimbilio; Uaminifu wake ni ngao na kigao.

Kwa leo naishia hapa.Mungu akubariki.

Ongea Na Nafsi Yako,Imshukuru MUNGU kila siku

The LORD reigns!
Tunapaswa kumshukuru MUNGU kila siku kwa kila jambo.Tunapoamka salama asubuhi ni jambo la kushukuru vile vile kabla ya kulala yatupasa kushukuru.Ikiwezekana muda wowote mzuri unaoupata,ongea na Mungu.YeYe yupo kila mahali wakati wote.Anakuona vizuri anakusikia,anajua yote hata ambayo yamejificha kwenye roho yako ambayo huenda huyafahamu.Tumaini lote liwe kwa Mungu maana Mungu akiwa upande wetu hakuna anayeweza kuwa kinyume chetu.

Wanadamu tumeumbwa tuna mwili,nafsi na roho.Mwili unaonekana ndio maana mtu anaweza kusema nimemuona fulani pale akinunua vitu dukani,nafsi  haionekani kwa macho ila inawasilisha ujumbe wake kupitia mwili.Roho ya mwanadamu nayo haionekani kwa macho ila ndo kila kitu.Inatunza kila jambo la mwanadamu.

Nafsi inasikia vizuri sana unapoongea nayo,unapoiamuru jambo fulani.Mfalme Daudi kwa kulijua hili,alikuwa anaongea na nafsi yake mara kwa mara huku akimwambia Mungu ni kiasi gani anamtegemea na kumtazamia katika maisha yake.

Wakati mwingine unakuwa umechoka lakini roho yako inataka kumsifu Mungu kwa matendo yake katika maisha yako.Hata kumsifu Mungu,kuomba unasikia huwezi.Umechoka.Unaweza ukachukua Biblia yako ukafungua Zaburi.Hiki ni kitabu kimejaa maombi,sifa na mengineyo mengi yanayoweza kueleza unavyojisikia,haja zako n.k mbele za Mungu kwa kina.Mojawapo ya zaburi nayopenda kuisoma
Zaburi 145

Ukuu na Wema wa Mungu 

¹Ee Mungu wangu, Mfalme, nitakutukuza,

Nitalihimidi jina lako milele na milele.

²Kila siku nitakuhimidi,

Nitalisifu jina lako milele na milele.

³BWANA ndiye mkuu mwenye kusifiwa sana,

Wala ukuu wake hautambulikani.

⁴Kizazi kwa kizazi kitayasifu matendo yako,

Kitayatangaza matendo yako makuu.

⁵Nitaifikiri fahari ya utukufu wa adhama yako,

Na matendo yako yote ya ajabu.

⁶Watu watayataja matendo yako ya kutisha,

Nami nitausimulia ukuu wako.

⁷Watalihubiri kumbukumbu la wema wako mkuu.

Wataiimba haki yako.

⁸ BWANA ana fadhili, ni mwingi wa huruma,

Si mwepesi wa hasira, ni mwingi wa rehema,

⁹ BWANA ni mwema kwa watu wote,

Na rehema zake zi juu ya kazi zake zote.

¹⁰ Ee BWANA, kazi zako zote zitakushukuru,

Na wacha Mungu wako watakuhimidi.

¹¹Wataunena utukufu wa ufalme wako,

Na kuuhadithia uweza wako.

¹²Ili kuwajulisha watu matendo yake makuu,

Na utukufu wa fahari ya ufalme wake.

¹³Ufalme wako ni ufalme wa zamani zote,

Na mamlaka yako ni ya vizazi vyote.

¹⁴BWANA huwategemeza wote waangukao,

Huwainua wote walioinama chini.

¹⁵Macho ya watu wote yakuelekea Wewe,

Nawe huwapa chakula chao wakati wake.

¹⁶Waufumbua mkono wako,

Wakishibisha kila kilicho hai matakwa yake.

¹⁷BWANA ni mwenye haki katika njia zake zote,

Na mwenye fadhili juu ya kazi zake zote.

¹⁸ BWANA yu karibu na wote wamwitao,

Wote wamwitao kwa uaminifu.

¹⁹ Atawafanyia wamchao matakwa yao,

Naye atakisikia kilio chao na kuwaokoa.

²⁰ BWANA huwahifadhi wote wampendao,

Na wote wasio haki atawaangamiza.

²¹Kinywa changu kitazinena sifa za BWANA;

Wote wenye mwili na walihimidi jina lake takatifu

milele na milele.

Ni vyema tukamwambia Mungu ya kwamba tunatambua wema na ukuu wake katika maisha yetu kila siku na kwamba tunamtegemea kwa kila jambo.

Nakuachia wimbo huu wa I will Bless You LORD By Hillsong

Be Blessed.

Bye.

IMANI (2)

Praise The LORD!...somo letu linaendelea

Imani Bila Matendo Imekufa 
Yakobo 2:14-17

Umeshawahi kumsikia Bwana Yesu akisema maneno kama 'Imani yako imekuponya' (Marko 10:52)kila wakati akimtimizia mtu sawa na alivyoomba?Unapomwomba Mungu jambo ni lazima uishi kimatendo katika imani uliyonayo kwake.Ni kama hivi,mfano una mtoto wako,amekuja amekuomba jambo fulani umsaidie lakini unaona kabisa ana majibu usoni na mashaka kwamba hutamsaidia.Hiyo tu inaweza kukufanya usimsaidie maana yeye ameshaonyesha hakuamini ni tofauti na mtoto huyo huyo akija ana moyo na matumaini yote kwamba utamsaidia.Unajua kutomsaidia huyu itakuwa ngumu sana?Maana kwanza unahofia kumvunja moyo na imani juu yako maana kati ya wote amekuona wewe ndio msaada hakuna mwingine halafu usipomsaidia utauweka moyo wake kwenye hali gani?Huyu mtoto ameonyesha matendo kabisa ya kwamba anakuamini.

Ndivyo ilivyo.Tunaona hata Abraham alitembea katika hali ya kumwamini Mungu mno.Kuanzia alipoambiwa aondoke aende mpaka nchi atakayoambiwa,hadi kumtoa mwana wake wa pekee Isaka.Soma kuanzia kitabu cha Mwanzo 12

Imani Kiasi Cha Punje Ya Haradali Tu,Inang'oa Milima
Matayo 17:20
Punje ya haradali ni ndogo.Lakini ukiwa na imani kiasi hicho tu,unauwezo wa kung'oa milima.Maana yake ni kwamba kiasi hicho hicho kidogo cha imani ulichonacho kina uwezo wa kufanya mambo makubwa yaliyo katika mapenzi ya Mungu,yakatokea.Unachotakiwa ni kukaa katika mstari,kuamini.Hebu angalia punje ya ubuyu,ukiipanda baada ya muda hutaamini kama ni kale kapunje tu ndo ulikokapanda.Vivyo hivyo kwa imani.Ni kama punje ya haradali lakini ina uwezo mkubwa sana wa kubadilisha hali yoyote kwenye maisha.Unatakiwa tu kuiimarisha,isife kama ambavyo punje hiyo ya ubuyu unaimwagilia maji na kuweka mbolea baada ya kuipanda ardhini,ili isife.

Somo hili ni refu kidogo...litaendelea
Mpaka wakati ujao..

TANZANIA KWA YESU!

IMANI

Praise The LORD!
MUNGU ni mwema kila wakati na kila wakati MUNGU ni mwema!

Natumaini unaendelea vizuri na maisha yako ya kila siku.Leo tunaangalia somo linalohusu Imani.

Imani Ni Nini?
Waebrania 11:1
1 Basi imani ni kuwa na hakika ya mambo yatarajiwayo, ni bayana ya mambo yasiyoonekana.

Turudie tena kusoma huo mstari hapo juu mpaka ueleweke vizuri.

Ni kuwa na hakika na jambo unalolitarajia.Ni bayana ya mambo ambayo hayajaonekana bado.Maana yakishaonekana kuna haja gani ya kuamini wakati tayari unaona ?

Katika kitabu cha Waebrania 11 tunaona wazee wetu wa zamani waliotutangulia jinsi walivyoenenda kwa Imani.Walienenda katika imani na Mungu alikuwa pamoja nao.

Je,unafahamu mojawapo ya njia ya kumpendeza Mungu ni kuwa na Imani Naye?

Waebrania 11:6

6 Lakini pasipo imani haiwezekani kumpendeza; kwa maana mtu amwendeaye Mungu lazima aamini kwamba yeye yuko, na kwamba huwapa thawabu wale wamtafutao.

Mistari ifuatayo ni vyema tukaisoma na kuitafakari kwa kina ili izame katika mioyo yetu.Inatuonyesha namna Mungu alivyoweka Imani ndani yetu.

Warumi 12:3

........kama Mungu alivyomgawia kila mtu kiasi cha imani.

2Wasethalonike 1:3

........kwa kuwa imani yenu inazidi sana, na upendo wa kila mtu kwenu kwa mwenzake umekuwa mwingi.

Warumi 10:17

Basi imani, chanzo chake ni kusikia; na kusikia huja kwa neno la Kristo.

Ukiisoma vizuri hii mistari hapo juu utagundua kuwa:

1.Mungu humpa kila mmoja wetu kiasi cha Imani.

Kwa nini kila mmoja lazima apewe kiwango fulani cha Imani?

Ni kwa sababu huwezi kuokoka bila kuwa na kiwango fulani cha imani katika Kristo maana Biblia imesema tumeokolewa kwa neema kupitia imani katika Kristo.Bila Mungu kutupa kiasi cha imani kila mmoja wetu,isingewezekana kuokoka kupitia Mwana wake mpendwa Yesu Kristo.

2.Mstari wa pili unatuonyesha kwamba baada ya Mungu kutugawia kila mtu kiasi cha imani,imani hiyo huendelea kukua ndani yetu.Ni rahisi sana mtu kuwa na kiwango kikubwa mno cha imani na Mungu pale mambo yanapokwenda vizuri lakini mambo yanapobadilika na kuwa mazito kiwango cha imani na Mungu hushuka.Ndio maana Mtume Paulo alisema yatupasa kupigana vita vizuri vya imani.Wakati mwingine inabidi kuipigania imani uliyonayo kwa Mungu ili kiwango chako cha kumwamini kisishuke haswa pale mtu unapopitia mazito.

3.Mstari wa tatu unatueleza namna ya kuikuza imani ambayo Mungu ameiweka ndani yetu.Imani chanzo chake ni kusikia na kusikia huja kwa Neno la Kristo.Kusikia Neno la Mungu inamaanisha kusikia Neno La Mungu kama lilivyo katika Biblia,kujisomea mara kwa mara na kulitafakari kwa kina lizame katika moyo.Mungu ni mwaminifu sana.Unapoamini na unavyozidi kujisomea Biblia ndivyo Roho Mtakatifu atakufundisha na kukuelimisha zaidi.Kwa mara ya kwanza kusoma biblia inakuwa kama huelewi mistari lakini kadri unavyoendelea kujisomea na kumshirikisha Mungu ndivyo anavyofungua upeo wako na hatimaye,ufahamu wa mambo ya kiroho unazama taratibu ndani yako.

Kwa leo naishia hapa.Somo hili litaendelea.

Mpaka wakati ujao....

TANZANIA KWA YESU!